ایران نے یورینیم منتقل کیا، کوئی انٹیلیجنس شواہد موجود نہیں، امریکی وزیردفاع
ایران نے یورینیم منتقل کیا، کوئی انٹیلیجنس شواہد موجود نہیں، امریکی وزیردفاع
واشنگٹن: امریکی وزیردفاع پیٹ ہیگسیتھ نے جمعرات کو کہا کہ انہیں ایسی کسی انٹیلیجنس کا علم نہیں جس سے ظاہر ہو کہ ایران نے اپنے جوہری پروگرام پر امریکی حملوں کے دوران اپنا اعلیٰ افزودہ یورینیم منتقل کیا ہو۔ امریکی فضائیہ نے اتوار کی صبح تین ایرانی جوہری تنصیبات پر حملے کیے، جن میں 30,000 پاؤنڈ وزنی بموں کا استعمال کیا گیا۔
ان حملوں کے نتائج کو بغور دیکھا جا رہا ہے تاکہ اندازہ ہو سکے کہ ایران کے جوہری پروگرام کو کتنا پیچھے دھکیلا گیا ہے۔
ہیگسیتھ نے ایک سخت مزاج پریس کانفرنس میں کہا:
"میں نے ایسی کوئی انٹیلیجنس نہیں دیکھی جو یہ کہے کہ چیزیں اپنی جگہ پر نہیں تھیں، یا منتقل کی گئی ہوں۔"
امریکی صدر ڈونلڈ ٹرمپ، جو صحافیوں کے ساتھ اس بات چیت کو دیکھ رہے تھے، نے اپنے وزیردفاع کی بات کی تائید کی اور کہا کہ حملے سے پہلے کچھ بھی منتقل کرنا ممکن نہیں تھا۔
انہوں نے اپنی سوشل میڈیا پوسٹ میں لکھا:
"جائے وقوعہ پر موجود گاڑیاں اور چھوٹے ٹرک تعمیراتی کارکنوں کے تھے جو شافٹس (زمین دوز راستوں) کے اوپر سیمنٹ ڈال رہے تھے۔ کوئی چیز تنصیب سے باہر نہیں لی گئی،" تاہم انہوں نے اس بات کے کوئی ثبوت فراہم نہیں کیے۔
کئی ماہرین نے خبردار کیا ہے کہ ایران نے حملے سے پہلے فورڈو کی زیر زمین تنصیب سے ہتھیاروں کے قریب درجے کا افزودہ یورینیم خفیہ مقام پر منتقل کر دیا تھا، جو اسرائیل، امریکہ یا اقوام متحدہ کے معائنہ کاروں کے علم میں نہیں۔
انہوں نے میکسر ٹیکنالوجیز کی سیٹلائٹ تصاویر کا حوالہ دیا جن میں جمعرات اور جمعہ کو فورڈو میں "غیر معمولی سرگرمی" دیکھی گئی، جہاں ایک طویل قطار گاڑیوں کی تنصیب کے داخلی دروازے پر موجود تھی۔
رائٹرز کو ایک سینئر ایرانی ذریعے نے اتوار کو بتایا کہ 60 فیصد افزودہ یورینیم کا بڑا حصہ حملے سے قبل ایک نامعلوم مقام پر منتقل کر دیا گیا تھا۔
فنانشل ٹائمز نے یورپی انٹیلیجنس رپورٹوں کے حوالے سے کہا کہ ایران کا افزودہ یورینیم کا ذخیرہ زیادہ تر محفوظ ہے کیونکہ وہ فورڈو میں مرکوز نہیں تھا۔
ہیگسیتھ نے ان دعووں کو مسترد کیا اور نیوز کانفرنس میں صحافیوں پر الزام لگایا کہ وہ امریکی حملوں کی کامیابی کو کم کر کے پیش کر رہے ہیں۔ انہوں نے بتایا کہ ڈیفنس انٹیلیجنس ایجنسی کی ابتدائی رپورٹ، جو کہتی ہے کہ حملے سے ایران کا پروگرام صرف چند ماہ کے لیے متاثر ہوا، "کم اعتماد" والی رپورٹ ہے۔
انہوں نے سی آئی اے ڈائریکٹر جان ریٹکلف کے حوالے سے کہا کہ نئی انٹیلیجنس ظاہر کرتی ہے کہ ایران کا جوہری پروگرام بری طرح متاثر ہوا ہے اور اس کی بحالی میں کئی سال لگ سکتے ہیں۔
ریٹکلف، ہیگسیتھ، سیکریٹری آف اسٹیٹ مارکو روبیو اور جنرل ڈین کین نے جمعرات کو امریکی سینیٹ کے تمام 100 ارکان کو حملوں پر بریفنگ دی۔ نیشنل انٹیلیجنس کی ڈائریکٹر تولسی گیبرڈ جو عام طور پر ایسی بریفنگ دیتی ہیں، اس اجلاس میں شامل نہیں تھیں۔
صدر ٹرمپ نے گزشتہ ہفتے کہا تھا کہ تولسی گیبرڈ غلط تھیں جب انہوں نے کہا تھا کہ ایران کے جوہری ہتھیار بنانے کے کوئی ثبوت موجود نہیں۔
سینیٹرز اس ہفتے ایک قرارداد پر ووٹ دیں گے جس کے تحت ایران پر حملے کے لیے کانگریس کی منظوری لازمی قرار دی جائے گی، تاہم اس قرارداد کے منظور ہونے کے امکانات کم ہیں۔
پینٹاگون کی پریس کانفرنس میں، ہیگسیتھ نے حملوں کو "تاریخی کامیابی" قرار دیا۔
پریس کانفرنس کے دوران، جنرل ڈین کین، جو امریکی فوج کے اعلیٰ ترین افسر ہیں، نے بموں کی تکنیکی تفصیلات بیان کیں اور ایک ویڈیو بھی دکھائی جس میں ان بموں کو بنکروں پر آزماتے ہوئے دکھایا گیا تھا۔
کین نے حملوں کی اپنی ذاتی رائے دینے سے گریز کیا اور کہا کہ انٹیلیجنس کمیونٹی ہی اس پر حتمی تبصرہ کرے گی۔ انہوں نے کہا کہ ان پر حملوں کے نتائج کو مثبت ظاہر کرنے کے لیے کوئی دباؤ نہیں ڈالا گیا۔
انہوں نے کہا:
"مجھے کبھی بھی صدر یا وزیردفاع نے کوئی ایسی بات کہنے پر مجبور نہیں کیا جو میری رائے نہ ہو۔ میں نے ہمیشہ ان سے وہی بات کی ہے جو میں سمجھتا ہوں۔"
0 Comments